首页 > 走进苏州 > 苏州地情故事

说古道今 | 快来看看这些吴江方言俗语,你能读懂多少......

时间: 2021-08-09 10:06 来源: 苏州市地方志编纂委员会办公室(市方志馆) 访问量:

吴江隶属苏州市,位于江苏省东南部,东临上海,西濒太湖,南接浙江。吴江地处江南腹地太湖流域,其语言属正宗的吴语方言。

隔壁小李拉亲伯,人相貌不错,但是邻居对伊印象勿好。嘎个人喜欢瞎搭几,有点搭死掼,爱瞎窜猪油经,空戳枪是三只手指头捡田螺的事,爱触祭老酒、荡街浪,伊拉见伊才不湿头,很少脱伊讲张。嘎拉,夫妻两个三六九要窝贝疖癞,小李拉恩娘是湿手捏了干面粉,时常勒拉小李面前讲,㑚丹亲伯是初三夜里个月亮,有勒呒不才一样。



著名语言学家周海中教授认为:语言是人类文化的载体和重要组成部分。每种语言都能表达出使用者所在民族的世界观、思维方式、社会特性以及文化、历史等,都是人类珍贵的无形遗产。当一种语言消失后,与之对应的整个文明也会消失。当今处于弱势的民族语言正面临着强势语言、全球化、互联网等的冲击,正处于逐渐消失的危险之中。


下面我继续向读者们分享一下我记忆中的方言、俗语,以下人物纯属虚构。


/ 方言故事 /


小斌勒拉六岁辰光,伊拉阿爸大明脱别人家到福建去送货,大明全世戳是啥个霉头,昨伲头汽车开到长深高速杭州境内,正好是垂夜快,后头的卡车闸生头里变道超车,大明为了让伊拉,结果连车带人一道翻滚二十多公尺的山脚下,区得及时报警,消防车脱救命车嗷扫来抢救,大明虽则勿宁翘辫子,现在发酿泥特,伊头颈下头的中枢神经呒不知觉了,这家人家豁边特,实茄一来,小斌拉娘要苦煞特,一家人家的吃用开销勿是一眼眼,真是百步无轻担啊。

小斌,伊拉爷娘从小就是宝宝仔、囡囡仔拿伊养大,值钿到含勒嘴里怕烊脱,捧勒手里怕碎脱的程度。眼睛一眨,小斌已经中专毕业了,大明拉公婆两个是少里出见的开心,想想自家这只呒脚蟹,区得是乡下人买芋艿种,伲子读书出来去寻个工作,不讲好坏,总归是十拿九稳的事体,公婆两个是盲人吃馄饨。



过脱国庆节,小斌总算勒拉隔壁镇上一爿照明灯具厂寻着个工作,伊上班呒不几日天,车间主任就话伊是:聪明面孔笨肚肠,绣花枕头一包草。上班搭死掼,做生活拆烂污,㑚好好叫话伊,这个小举三真个有点枉绷劲,有个辰光弄弄就要杜蛮主意。小斌架型蛮好,这个现世徘徊的笃脸倒蛮讨人欢喜,就是有点七勿老欠,触二勿三 ,伊拉才话伊是夜壶里笃鸭独出只嘴 。

小斌常常要轧给前八尺,无规无矩、老乱不吊,村里的阿叔、老伯伯看伊老头老脑,干脆叫伊一把十三节。小赤佬真是个瞎透乱,常常黑缠三官经,厚脂纳得,像沙锅里摊的面饼。娘娘、阿爹话话伊,俨是木而觉之;四五十岁的人都勒拉讲,脱伊两个搭,真的是大肚皮着裤子,这副猪牙啃啃的样子,别人家见着伊才喊触气,这个脱头落襻的小杀胚,伊拉见伊才不色头。



车间里有个来了个实茄肮三的小年轻,车间主任只好脱伊弄堂里拔木头㑚要勒唔丹厂里上班格,真格要好好叫改一改,唔对㑚讲了几转了,㑚勿好一直是墙头上刷白水,㑚真想要勒格搭上班,勿好倒扳桨,勿好弄松唔,否则唔要芽麦塌饼两面熯,隔两日要窝贝疖癞的,唔阿是泥菩萨过江,自身难保。㑚还勿好好叫上班,明朝头唔去脱厂长汇报,叫伊回头㑚勿要来上班了。

车间主任语重心长告诉小斌:老古话:水浸木头烂,火到猪头酥,只要㑚肯学,总归学得会。养是儿子不养爷,养是孙子吃阿爹,㑚真格勿好做实茄的小青年,爷娘不好养到㑚老格。唔卡才听老一辈人讲过:靠爷娘不老,靠亲眷不饱;爷有娘有,不如自有,小斌啊,今朝唔脱㑚攋底绷,㑚不要再野豁豁了,实茄混落去,真的要成掼脱货格。㑚勿好磕头呒救,倘然能听唔格,应该来个赌神发愿,砻糠搓绳起头难,不怕别人看不起,就怕自己不争气。年轻苦,风吹过,老来苦实是苦,从明朝头开始,㑚勿作兴再脱头落襻了,倘然㑚俨是实茄的定头货,唔要叫厂长开除㑚特,㑚好好考虑考虑吧。



小斌听到要被厂里开除了,眼睛地牌式,伊细细叫考虑了一天,总算想通了,唔奴再实茄猪头眼瞎,唔奴再实茄肉骨头敲鼓,唔奴再实茄搭死隈,不正是像老寿星吃砒霜了吗?直生浪头 ,小斌明白了,唔奴勿好学小和尚念经,勿好再像称砣落水了,格歇辰光,小斌对车间主任脱伊讲格道理,真格弄得像小葱拌豆腐一样了。伊奴想要豪燥去寻车间主任表个态,小斌鼓足勇气找到赵主任,当着赵主任的面讲:昨伲头㑚脱唔讲的道理唔想通了,唔奴保证从今朝开始,好好叫上班,认真向老师傅学习,坚决勿实茄滥塌糊涂,希望赵主任能原谅唔,唔奴决不再吊儿郎当,决不弄㑚花巧,唔是石头上掼乌龟



眼睛一眨,快一年过去了,当唔再次碰着小斌格车间主任,赵主任脱唔讲:现在的小斌,不像原来浮脱离戏,做生活也不偷私乖了,脱同事相处也越来越有礼貌了。格辰光车间里好多人认为,小斌若要变好,是捏鼻头做梦的人,现在可以自落篷了。

小斌发生了巨大变化,赵主任现在对小斌格个人是忧啊勿要忧,就像八角亭上挂葫芦了。小斌拉爷娘看到伲子的变化,更是十六夜里做亲”——喜出望外。同一车间的同事们议论纷纷:吾里车间原来十皮遢里的勺头,现在好阿拉,小斌嘎拉,真有点像秃笼着长衫,大家才蛮得神。

老祖宗传承下来的民谚俗语,比喻生动,形象鲜明,而且富有幽默感。传承方言需要政府多个部门同心协力,传承方言必须牢记要从娃娃开始抓起,传承方言需要有关部门的率先垂范!



文中图片均由作者提供

拟稿:原创作者投稿

审核:市地方志办秘书处

发布:市地方志办秘书处

相关文件:

扫一扫在手机打开当前页